Nanalong tserman, misis niratrat sa Cavite
MANILA, Philippines — Nasa kritikal na kondisyon ang isang barangay chairman na nagwagi sa katatapos na Barangay at Sangguniang Kabataan elections (BSKE) at misis nito matapos tambangan ng ‘di kilalang salarain habang sakay ng barangay patrol vehicle sa Brgy. Luzviminda 1, Dasmariñas City, Cavite kamakalawa.
Kapwa nagtamo ng mga tama ng bala sa katawan ang mga biktima na nakilalang sina Benjamin Macalalad Marcha, 52-anyos, incumbent chairman ng Brgy. Luzviminda 1, Dasmariñas City at ang misis nitong si alyas “Loida”.
Sa ulat nina Police Master Sergeant Benjamin De Leon Jr. at P/Sgt. Christopher Postrero ng Dasmarinas City Police, alas-5:30 ng madaling araw habang sakay ang mag-asawang Marcha ng barangay patrol car at bumabagtas sa Brgy. Luzviminda nang bigla silang paulanan ng bala ng isang nakaabang na ‘di nakilalang suspek.
Nang makita ng salarin na natamaan nito ang mga biktima at inakalang mga napuruhan ng mga bala, agad siyang tumakas tangay ang ginamit na armas sa pamamaril.
Agad namang naitakbo sa Pagamutan ng Dasmariñas ang mga biktima ng mga sumaklolo sa kanila.
Sa kasalukuyan, wala pa ring malinaw na motibo sa insidente habang inaalam ng pulisya kung may kinalaman ang pamamaril sa nagdaang eleksyon kung saan nanalo muli ang biktima.
- Latest
