Heightened alert ikakasa ng PNP sa transport strike
MANILA, Philippines — Inihayag ng Philippine National Police (PNP) na ilalagay nila ngayong Linggo ang kanilang mga unit sa heightened alert status bunsod ng isang linggong transport holiday na inorganisa ng ilang grupo ng transportasyon.
Sinabi ni PNP Public Information Office chief Police Colonel Red Maranan na 80% ng puwersa ng pulisya ang naka-duty para magbigay ng tulong at seguridad sa commuters na maaapektuhan ng transport strike.
“Itataas natin ang ating alert status. Magpapakalat tayo ng mga pulis doon sa mga lugar kung saan sumasakay ang ating mga kababayan para makapagbigay tayo ng kaukulang seguridad sa ating mga kababayan,” aniya pa.
Sinabi ni Maranan na ilalaan ng PNP ang mga available na mobile patrol vehicles nito para makapagbigay ng libreng sakay sa mga commuter papunta sa kanilang destinasyon.
Babantayan at imomonitor ng PNP ang mga lalahok sa transport strike upang matiyak na hindi mangha-harass ang mga ito ng mga PUVs na patuloy sa pagbiyahe.
Pinayuhan din niya ang publiko na maging maingat at iwasang lumabas kung wala silang mahahalagang plano.
- Latest