Go muling inihirit ang pagbuo ng Department of OFWs
MANILA, Philippines — Dahil kabilang ang daan-daan libong overseas Filipino workers (OFWs) na lubhang apektado ng COVID-19 pandemic, muling nanawagan si Senator Christopher Lawrence “Bong” Go na madaliin na ang pagbuo sa Department of Overseas Filipino Workers (DOFWs).
Sinabi ni Go na kung may sariling kagawaran para sa mga Filipino na nagtatrabaho sa ibang bansa, mas matututukan ang kanilang mga pangangailangan at agad silang maseserbisyuhan.
Nakalipas na ang mahigit isang taon nang lumusot sa Kamara ang bersyon ng panukala at simula noon ay nakabinbin na ito sa Senate Committee on Labor.
Layon ng panukala na mapag-isa na sa isang kagawaran ang lahat ng mga ahensya ng gobyerno na ang mga mandato ay may kinalaman sa kapakanan ng mga Filipino sa ibang bansa.
Pansin ni Go, kulang ang koordinasyon ng mga ahensya kayat nahihirapan pa ang OFWs sa pag-asikaso sa kanilang mga kailangan.
Pagdidiin ng senador, lubhang napakahalaga na may kagawaran para sa mga OFW para agad din nakakatugon ang gobyerno sa tuwing may krisis na lubhang nakaka-apekto sa kanila.
- Latest
