Du30 ipapa-impeach si Morales

MANILA, Philippines — Magsasampa ng impeachment complaint sa Kamara si Pangulong Rod­rigo Duterte laban kay Ombudsman Conchita Carpio-Morales.

Ito ang sinabi kahapon ni Pangulong Duterte sa media interview bago magsimula ang cabinet meeting sa Malacañang.

“We will file an impeachment case vs Ombudsman Morales. I will show to the Republic that we have a very serious problem with our gov’t officials,” giit pa ni Pa­ngulong Duterte sa Malacañang reporters.

Anya, ang magiging batayan sa pagsasampa ng impeachment laban kay Morales ay ang selective justice, paglabag sa anti-graft and corrupt practices act at paggamit ng falsified documents matapos ibulgar umano ni Deputy Overall Ombudsman Melchor Carandang ang sinasabing bank documents nito, samantalang itinanggi ng Anti-Money Laundering Council (AMLC) na nagmula sa kanila ang sinasabing mga dokumento.

Ang pinakahuling biktima ng selective justice ng Ombudsman ay si Sen. Gringo Honasan na kinasuhan kaugnay ng umano’y maling paggamit ng Priority Development Assistance Fund (PDAF) nito.

Naunang inakusahan ni Duterte na ginagamit ng mga ‘dilawan’ sina Morales at Chief Justice Ma. Lourdes Sereno upang pabagsakin siya sa puwesto.

Ayon pa kay Duterte, na­bigo si Chief Justice Sereno na ideklara ang ilang items sa kanyang Statement of Assets, Liabilities and Networth (SALN).

Iginiit ni Duterte na wala siyang kilalang ‘Snooky Cruz’ gaya ng akusasyon ni Sen. Trillanes na binayaran daw ng pa­ngulo ng P10 milyon kapalit ng pagbibigay ng bank documents ni Trillanes abroad.

The only Snooky I know is the actress and “yung sa comics,” kaugnay sa akusasyon ni Sen. Trillanes sa kanyang privilege speech kamakalawa.

“If you see billions of pesos in my account, oust me. If my lifetime savings exceeds P40M, I will resign,” wika pa ng Pangulo.

Inakusahan pa ng Pa­ngulo si Trillanes na illegal na nakuha nito ang sinasabing bank records mula sa kanyang ‘mistress’ na si Julia Bacay-Abad ng Anti-Money Laundering Council (AMLC).