Rider iniwasan ang aso, dedo sa semplang

MANILA, Philippines – Isang 29-anyos na lalaki ang nasawi nang ito ay sumemplang sa minamanehong motorsiklo matapos iwasan ang tumatawid na aso sa kahabaan ng CM Delos Reyes Avenue, Brgy. Loma Amadeo, Cavite.

Ang nasawi ay kinilalang si Ariel Alfredo, 29, binata, construction worker, ng #11 P Zamora St., Brgy. 6, Poblacion ng nasabing bayan.

Batay sa ulat, bago  nangyari ang insidente dakong alas-2:30 ng hapon ay minamaneho ng biktima ang Mitsukoshi Bonus 110 motorcycle at binabagtas ang nasabing lugar nang biglang sumulpot ang isang aso na tatawid. Sa pagkabigla ay sinubukan ng biktima na ipreno ang kanyang motor, subalit dahil sa may kabilisan ang patakbo ay hindi nakayan ng kanyang preno kaya’t sumemplang at sumadsad sa kalsada.

Bagama’t hindi nabangga ang aso ay masama ang pagsemplang ng biktima kaya’t dinala ito sa pagamutan, subalit hindi na ito umabot ng buhay.