Ginang pinag-almusal ng bala

MANILA, Philippines - Isang 56-anyos na ginang na nagluluto ng agahan para sa kanyang pamilya ang binaril sa loob ng kanilang kubo sa Brgy. Palma, Basista, Pangasinan kamakalawa.

Ang biktima na idineklarang dead-on-arrival sa ospital ay kinilalang si Generosa delos Santos.

Batay sa ulat, bago nangyari ang pamamaril sa biktima dakong alas-9:00 ng umaga sa kanyang kubo sa Velasquez Street, Brgy. Palma, Basista ng lalawigan ay abala ito sa pagluluto nang biglang sumulpot ang gunman na lulan ng motorsiklo at walang kaabog-abog na binaril ito.

Nagawa pang makatakbo ng ginang, pero hinabol ito ng suspek at muling pinagbabaril upang tiyakin ang kamatayan nito bago tumakas.