Iba’t-ibang sasakyan dumale, bebot lasog sa hit-and-run

MANILA, Philippines - Nagmistulang bola sa kalsada ang isang di pa nakikilalang babae matapos na magulungan at malasog ng iba’t – ibang uri ng sasakyan sa flyover sa Pasay City kahapon ng madaling-araw.

Nahihirapan ang pulisya na kilalanin ang bangkay ng biktima dahil nga nagkahiwalay-hiwalay ang katawan nito at bukod sa nasagasaan ito ng ibat-ibang uri ng sasakyan at posibleng nagulungan din 10-wheeler truck dahil sa ebidensiyang nakita sa bangkay nito.

Sa inisyal na pagsisiyasat ng Traffic Accident Investigation Unit (TAIU) ng Pasay City Police, natagpuan ang gutay-gutay na katawan ng biktima dakong alas-4:00 kahapon ng mada­ling araw sa South bound lane  ng flyover ng  Roxas Boulevard.

Sa nakalap na impormasyon ng pulisya sa basurerong si Crispin Casero, alas-3:00 ng madaling araw  habang siya ay nangangalakal sa naturang lugar  narinig niya ang isang sasakyan na may nabangga ito.

May hinala ang pulisya na posibleng nasagasaan ito ng ibat-ibang uri ng sasakyan sa naturang lugar dahilan upang magkahiwalay-hiwalay ang katawan nito.

Sa ngayon ay patuloy pang iniimbestigahan ang naturang insidente at ang bangkay ng biktima ay nakalagak ngayon sa Rizal Funeral Homes.