Shabu lab sinalakay: 6 Chinese nationals tiklo

MANILA, Philippines – Nadakip ng mga otoridad ang 6 Chinese natio­nals at nakumpiskahan ng hindi pa madeterminang dami ng shabu  sa isang raid sa isang shabu laboratory sa Valenzuela City kahapon.

Kinilala ang mga naarestong suspek  na sina James Chua, Cai Chin, Cai Qing Chi, Leo Ching,­ Qing Shi, at isa pang hindi nakilalang Tsino.
Batay sa ulat, dakong alas-2:45 ng hapon nang sala­kayin ng mga otoridad sa bisa ng search warrant na inisyu ni Malabon Regional Trial Court Branch 174 Judge Celso Magsino ang 493 Omega 1st Malinta Industrial Estate Rincon sa Malinta.

Ang pagsalakay ay resulta ng dalawang linggong surveillance operation.

Nabatid na kayang lumikha ng 15 hanggang 20 kilo ng shabu kada araw sa naturang pasilidad na siyang ikinakalat sa CAMANAVA area.

Nabatid na “high tech” na kagamitan ang ginagamit na mga sindikato kaya walang amoy na lumalabas sa laboratoryo kaya walang kaalam-alam ang mga residente sa iligal na operasyon.