Dalaga binoga sa mukha, bulagta
MANILA, Philippines - Bulagta ang isang dalaga makaraang barilin sa mukha ng hindi pa nakikilalang salarin sa Quezon City, kahapon ng umaga.
Ang biktima ay kinilalang si Jennifer Villarin, 34, nakatira sa Block 28, Area 3, Manga st., Brgy. Capri, Novaliches.
Ayon kay PO2 Hermogenes Capili, ang biktima ay nagtamo ng isang tama ng bala sa mukha na naglagos sa likuran ng ulo nito at agad na nasawi.
Base sa pahayag ng ilang residente sa lugar, ang biktima umano ay isang bugaw at sangkot din sa pagbebenta ng iligal na droga na siyang masusing iniimbestigahan ngayon ng pulisya.
Nabatid na ang krimen ay naganap sa Geronimo St., Brgy. Sta Monica, Novaliches, ganap na alas-7:30 ng umaga.
Sinabi nina Lita Podra at Corina Mollejo, mga tindera sa lugar, nag-aasikaso sila ng kanilang mga paninda nang marinig nila ang putok ng baril malapit sa kanilang lugar.
Agad nilang pinuntahan ang pinagmulan ng putok at doon ay makita ang nakabulagtang dalaga at wala ng buhay.
Nagsasagawa pa ng masusing imbestigasyon ang mga awtoridad upang matukoy at madakip ang salarin.
- Latest