Holdaper napatay sa gulpi

MANILA, Philippines - Isang lalaki na umano ay holdaper ng pampasaherong jeep ang nasawi nang ito ay gulpihin ng mga galit na pasahero na tinangka nitong holdapin sa Pasay City.

Ang suspek na walang pagkakakilanlan na nasawi habang nilalapatan ng lunas sa Pasay City General Hospital ay nasa pagitan ng edad 30-35, katamtaman ang katawan, mahaba ang buhok, nakasuot ng t-shirt na iba’t iba ang kulay at maong na pantalon.

Hindi pa kilala ang limang lalaki na nakitang nagtulong-tulong sa panggugulpi sa suspek.

Sa ulat, dakong ala-1:15 ng madaling-araw sa kanto ng Cabrera St., at EDSA ay nasaksihan ng dalawang tricycle driver na bumaba ng jeep ang limang lalaki at hinabol ang suspek na umano ay nagtangkang mangholdap.

Nang abutan ay walang habas na pinagsusuntok at pinagtatadyakan hanggang mawalan ito ng malay tao.

Nakuha ng pulisya sa nasawi ang isang replica ng kalibre .38 revolver na may anim na bala na nakasukbit pa sa kanyang baywang.