Sekyu binareta sa ulo

MANILA, Philippines - Hindi na umabot ng buhay sa ospital ang isang 40-anyos na guwardiya matapos na hatawin ito ng bareta de kabra sa ulo ng hindi pa kilalang suspek kahapon ng umaga sa Binondo, Maynila.

Ang nasawi ay kinila­lang si Rene Refil, ng Purok 4, Dulo Alabang, Muntinlupa City.

Batay sa ulat, pasa­do alas-6:00 ng umaga sa  harap ng DIY Warehouse Buil­ding sa kahabaan ng Das­mariñas kanto ng Burke Sts., Binondo, Maynila nang ma­karinig ang isang sekyu na si Alwin Abong ng malakas na sigaw ng bik­ti­ma.

Agad na tinungo ni Abong ang pinagmulan ng sigaw at pagbukas ng gate ay nakita niya ang isang lalaki na nakasuot ng puting t-shirt na  umano ay mukhang bangag sa alak na nakatayo sa harap ng biktima na  nakalugmok na sa semento.

Binulyawan ni Abong ang suspek na agad tuma­kas.

Hindi pa batid ng pulis­ya kung ano ang motibo ng pagpatay.