Executive of the Year ibibigay kay Gregorio

MANILA, Philippines — Pararangalan si Philippine Sports Commission (PSC) chairman Patrick ‘Pato’ Gregorio ng Executive of the Year award sa San Miguel Corporation-Philippine Sportswriters Association 2025 Awards Night na gaganapin sa Pebrero 16 sa Diamond Hotel Manila.

Igagawad kay Gregorio ang naturang parangal dahil sa magandang pamamalakad nito sa PSC gayundin ang matagumpay na programa nito para sa Philippine sports.

Makakasama ni Gregorio sa spotlight sina gymnast Carlos Yulo at rising tennis star Alex Eala na tatanghaling Male at Female Athletes of the Year.

Wala pang isang taon si Gregorio sa PSC. Itinalaga itong PSC chairman sa kalagitnaan ng 2025.

Ngunit sa maiksing panahon, marami nang nai­patupad si Gregorio kabilang na ang across-the-board increase na P5,000 kada buwan sa allowance ng national athletes at coaches.

Binuksan din ni Gregorio ang pintuan ng Rizal Memorial Complex, Philsports at Teachers Camp sa Baguio para sa mga Pilipinong nais mag-ensayo o tumakbo sa mga track oval ng ahensiya.

Sa ilalim din ng pamumuno ni Gregorio naganap ang FIVB Men’s Volleyball World Championship, FIG Artistic Gymnastics Junior World Championships, at FIFA Futsal Women’s World Cup.

Pinangalanan din si Gregorio bilang chairman ng National Sports Tourism-Interagency Committee na siyang nanguna sa pagdaraos ng WTA 125 tournament na Philippine Women’s Open kamakailan.

Kaliwa’t kanan din ang renovations sa Rizal Memorial Complex kabilang na ang tennis center, baseball pitch, media conference room, Philsports track oval, at training facilities sa Baguio.

Sa ilalim din ng pamumuno ni Gregorio, maganda rin ang naging samahan ng PSC at Philippine Olympic Committee upang mas lalong mapaganda ang programa para sa mga atleta.