AJ Edu lalaro sa FIBA OQT
MANILA, Philippines — Muling masisilayan si Filipino-Cypriot AJ Edu suot ang Gilas Pilipinas jersey sa FIBA Olympic Qualifying Tournament na lalarga sa Hulyo sa Riga, Latvia.
Kumpirmado na ang pagbabalik ni Edu kung saan inaasahang makakasama ito sa training camp ng Gilas Pilipinas sa Hunyo sa Inspire Sports Academy sa Calamba, Laguna.
Regular na nagkakausap sina Edu at Gilas coach Tim Cone.
Sumailalim sa rehabilitasyon si Edu matapos itong magtamo ng injury habang naglalaro ito para sa Toyama Grouses sa Japan B. League noong Disyembre.
“He’s not yet back to playing but he’s at the very edge of ending his rehab process. He’s going from Japan to London and has a physiotherapist to work with. So he should start playing in a week or two and he should be fine and ready to go on the 21st,” ani Cone.
Para kay Cone, malaking tulong ang pagbabalik ni Edu sa lineup upang mas lalong mapalakas ang depensa ng tropa sa shaded area.
Matatandaang hindi nakapaglaro si Edu sa first window ng FIBA Asia Cup 2025 Qualifiers noong Pebrero kung saan nanalo ang Gilas Pilipinas kontra sa Hong Kong at Chinese-Taipei.
Bago ang FIBA Olympic Qualifiers, sasabak muna ang Gilas Pilipinas sa tuneup games kontra sa Turkey at Poland sa Europe bago tumulak sa Riga, Latvia.
- Latest
