Esteban goodbye na sa Team Philippines

MANILA, Philippines — Hindi na masisilayan si top fencer Maxine Esteban suot ang jersey ng Team Philippines.

Ito ay matapos magpasya si Esteban na magpalit ng nationality at katawanin ang bansang Ivory Coast sa mga susunod na international meets.

Pormal nang ipinaalam ni Esteban ang lahat sa Philippine Fencing Association (PFA).

Inaprubahan naman ito ng PFA at umaasang hindi na kakailanganin pa ni Esteban na sumailalim sa three-year residency na requirement ng international fencing federation (FIE).

Nagpadala na ng sulat ang PFA sa FIE para ipaabot ang suporta nito.

Ipinadala ang sulat ni PFA president Richard Gomez kay FIE chief executive officer Nathalie Rodriguez.

“We support her change of nationality representation to Côte d’Ivoire (Ivory Coast) where she is also a naturalized citizen,” ani Gomez.

Bagama’t hindi na Pilipinas ang kakatawanin nito, hangad ng PFA ang tagumpay ni Esteban.

Sumulat na rin si Esteban sa Philippine Olympic Committee para ipaalam ito.

Kasalukuyang No. 84 sa world ranking si Esteban.

Ito ang pinakamataas na ranking ng isang Pinoy fencer.

Umaasa si Esteban na makakapasok ito sa 2024 Olympic Games na gaganapin sa Paris, France.