Team Philippines umani pa ng 5 ginto
Chua, EJ umukit ng bagong SEAG record
MANILA, Philippines — Limang gintong medalya ang kinolekta ng Team Philippines para manatiling palaban sa 32nd Southeast Asian Games sa Cambodia kahapon.
Ang mga ito ay nagmula kina gymnast Caloy Yulo, pole vaulter Ernest John Obiena, swimmer Xiandi Chua, triathlete Fernando Casares at martial artist Robin Catalan silvers at 26 bronzes.
Humakot si Yulo ng 84.000 points sa anim na apparatus para pagharian ang men’s Individual All-Around event at iginiya ang men’s team all-around sa silver medal finish.
Nagposte naman ng mga bagong SEA Games record sina Obiena at Chua.
Lumundag ang World No. 3 na si Obiena ng 5.65 meters para pagharian ang pole vault habang naglista si Chua ng 2:13.20 sa women’s 200m backstroke.
May silver sina swimmers Chloe Isleta (2:16.19) sa women’s 200m backstroke at Olympian Jasmine Alkhaldi (56.12) sa women’s 100m freestyle.
Nagsumite naman ng 58 minuto at 33.5 segundo si Casares para kunin ang triathlon gold kasunod sina silver medalist Rashif Amila Yaqin ng Indonesia (58:47.7) at kababayang si bronze medalist Kim Remolino (59:55.5).
Minalas si duathlon queen Kim Mangrobang na maibulsa ang women’s triathlon gold nang makuntento sa silver sa kanyang 1:07:24 kumpara sa 1:05:34.2 ni naturalized Cambodian Margot Garabedian, may dugong French.
Umagaw ng eksena si Catalan nang magwagi sa kun bokator men’s combat 50kg category.
Inihabol ng SIBOL team ang ika-15 ginto ng Pinas noong Linggo ng gabi matapos pagharian ang eSports League of Legends: Wild Rift competition.
Hindi naman nabokya ang bansa sa karate, cycling, vovinam at kun bokator events.
- Latest
