Tszyu bumilib sa lakas ni Pacquiao
MANILA, Philippines — Nagparamdam agad ng lakas si eight-division world champion Manny Pacquiao sa pagsisimula ng sparring session kasama si unbeaten Australian fighter Tim Tszyu sa Elorde gym sa Pasay City.
Ramdam na ramdam ni Tszyu ang puwersa ng Pambansang Kamao sa apat na rounds ng sparring session ng dalawa.
“It’s like a sting. Imagine like a sting that you feel it in few seconds. It’s a different power than what I have been hit before. He’s quick,” ani Tszyu sa 40-anyos na si Pacquiao.
Naniniwala si Tszyu na kayang-kaya ni Pacquiao na maitarak ang knockout win kay undefeated American Keith Thurman sa kanilang unification bout sa Hulyo 20 sa MGM Grand Garden Arena sa Las Vegas, Nevada.
“When he got these angles, then he will catch Thurman. If he sees Thurman hurt, Pacquiao will go for the kill to get that TKO,” ani Tszyu.
Ayon naman kay Filipino chief trainer Buboy Fernandez, parehong-pareho ang estilo nina Tszyu at Thurman kaya’t magandang pagkakataon ito para kay Pacquiao.
“Magkatulad sila ng style ni Thurman. Pareho sila ng galaw, maganda ang sparring nila ni Manny and hopefully may maipakita pa siya (Tszyu) sa mga susunod na sparring sessions,” ani Fernandez.
Maliban kay Tszyu, nakaabang din ang ilan pang sparring mates kay Pacquiao sa Wild Card Gym sa Los Angeles, California.
Kumuha na sina Hall of Famer Freddie Roach at Sean Gibbons ng mga matitikas na boksingerong makakaharap ni Pacquiao sa oras na tumuntong ang fighting Senator sa Amerika.
Nais naman ni strength and conditioning expert Justin Fortune na sumailalim si Pacquiao sa iba’t ibang sparring partners kada araw.
- Latest
