Espejo hinugot ng Japanese team
MANILA, Philippines — Dadalhin ni five-time UAAP MVP Marck Jesus Espejo ng Ateneo de Manila University ang kanyang talento sa Japan.
Ito ay matapos kunin ang mahusay na outside hitter bilang reinforcement ng Oita Miyoshi Weisse Alder na naglalaro sa top notch Japanese volleyball league.
Tiwala ang Oita Miyoshi Weisse Alder na malaki ang maitutulong ni Espejo sa kanila.
Maituturing na scoring machine si Espejo na kayang makalikom ng puntos sa open spot gayundin sa backline.
Armado rin ang 6-foot-2 wing spiker ng pamatay na jump serve.
Magsisimula ang kontrata ni Espejo sa White Eagle sa Setyembre 1 hanggang Mayo 5, 2019.
Naglaro na sa Pilipinas ang Oita Miyoshi Weisse Alder noong 2014 Asian Men’s Volleyball Championships na ginanap sa iba’t ibang venues sa Maynila kung saan nagtapos ang koponan sa pang-13 puwesto.
Nagsimula ang Oita Miyoshi Weisse Alder noong 2004 kung saan nasa ika-limang puwesto ito sa local league.
Umangat sa No. 1 ang Oita Miyoshi Weisse Alder noong 2005 at na-promote sa top league V1 na siyang nilalaruan ng tropa hanggang sa kasalukuyan.
Maganda ang record ng White Eagle na nagkampeon noong 2005-2006, 2014-2015 at 2016-2017, habang pumangalawa ang koponan noong 2013-2014, 2015-2016 at 2018-2019.
- Latest
