Fajardo, Romeo bibida sa Visayas All Stars

MANILA, Philippines – Sasagupain nina June Mar Fajardo, Terrence Romeo at Kiefer Ra-vena ang mga kapwa nila miyembro ng Philippine men’s team sa darating na PBA All-Star game.

Babanderahan nina Fajardo, Ravena at Romeo ang Visayas selection sa pagharap sa Gilas Pilipinas sa Mayo 27 sa Iloilo City para sa final phase ng three-stage PBA All-Star game.

Parehong naglaro sina Ravena at Fajardo sa national team sa unang dalawang windows ng FIBA World Cup qualifiers habang dahil sa kanyang knee injury ay hindi nakasama si Romeo sa nasabing torneo.

Naiboto ang tatlo bilang starters para sa All-Star unit na hahawakan ni Magnolia head coach Chito Victolero kasama sina Barangay Ginebra big man Greg Slaughter at Rain or Shine star James Yap.

Ang iba pang nasa Visayas roster para sa PBA All-Star game ay sina JR Quiñahan, Jeff Chan, Chris Ross, Joe Devance, Eman Monfort, Jericho Cruz at ve-teran Asi Taulava.

Sasandigan naman ni national coach Chot Reyes ang kanilang bilis para tabunan ang bentahe ng mas malala-king Visayas selection na magtatampok sa Twin Tower nina Fajardo at Slaughter.

Hinugot ni Reyes para sa Gilas sina Japeth Aguilar, Troy Rosario, Mac Belo, Carl Bryan Cruz, Jayson Castro, Gabe Norwood, Jio Jalalon, Calvin Abueva, Matthew Wright at Allein Maliksi.

Ginagamit ng Gilas ang All-Star stint bilang paghahanda para sa susunod na window ng World Cup sa Hulyo.

Sisimulan ang touring mid-season classic sa Mayo 23 sa Digos, Davao del Sur kung saan lalaba-nan ng Mindanao selection ni coach Tim Cone ang Nationals ni Reyes.

Sa Mayo 25 sa Batangas City ay tatapatan naman ni coach Leo Austria at ng Luzon squad ang Gilas.