Abot-kamay na ni Morales

ILOILO CITY, Philippines - Nakamit ni Mark Julius Bordeos ng Kinetix Lab-Army ang una niyang lap victory, habang pormalidad na lamang ang gagawin ni Jan Paul Morales ng Navy-Standard Insurance para angkinin ang korona ng 2017 LBC Ronda Pilipinas.

Pinagharian ng 21-an-yos na si Bordeos ang 209-km Iloilo-Antique-Iloilo Stage 13 sa kanyang isinumiteng limang oras, 19 minuto at isang segundo para ibulsa ang premyong P20,000 kahapon dito sa Iloilo Business Park.

“Siyempre, masaya kasi ito ang unang stage win ko,” sabi ni Bordeos sa 14-stage race na inihahandog ng presentor na LBC katuwang ang MVP Sports Foundation, Petron, Mitsubishi, Versa.ph, Victory Liner, Maynilad at Standard Insurance.

Inungusan ng tubong Laoac, Pangasinan sa fi-nish line sina Stage One winner Ronald Lomotos (5:19:01) ng Navy, ang kapwa Armyman na si Cris Joven (5:19:01), Leonel Dimaano 5:19:01) ng RC Cola-NCR, Roel Quitoy 5:19:01) ng Team Mindanao, Lord Anthony del Rosario 5:19:01) at Marvin Tapic (5:19:03) ng Army, Morales (5:19:10), Ronnilan Quita (5:22:30) ng Army at Joshua Mari Bonifacio (5:22:48) ng Go for Gold.

Samantala, nakatakdang pakawalan ngayong umaga ang 50-km Stage 14 criterium na magsisilbing coronation ride para sa 31-anyos na si Morales.

Nagtala ang tubong Calumpang, Marikina ng oras na 43:50:45 para sa kanyang pagsuot sa Red Jersey at ang pamumuno sa overall individual classification.

“Sa akin na siguro ito,” sabi ni Morales, pinagharian ang Stage Two-criterium sa Vigan, Ilocos Sur, ang Angeles-Subic Stage Three, ang Pili-Daet Stage Seven, ang Stage Nine criterium sa Sta. Rosa, Laguna at ang Stage 12-Individual Time Trial sa Guimaras noong Huwebes.

Ang magkakampeon ay tatanggap ng prem-yong P1 milyon.

Kasunod ni Morales ang kapwa niya Navyman na si Rudy Roque (44:03:54) at  Joven (44:06:55) Bryant Sepnio (44:17:58) ng Go for Gold.

Inaasahan ding aangkinin ng Navy ang overall team crown sa kanilang tiyempong 172:24:43 kasunod ang Army (173:14:52) at Go for Gold(173:24:23). Ang premyo sa team event ay P50,000.