Accel-PBA Press Corps Player of the Week: Jericho Cruz - Rain Or Shine

MANILA, Philippines – Dahil wala si Paul Lee bunga ng injury, nagkaroon ng pagkakataon si Jericho Cruz na ipakita ang kanyang galing sa kasalukuyang Smart Bro-PBA Philippine Cup.

Idiniliber ng dating Adamson shooting guard ang key baskets upang tulungan ang Rain or Shine sa panalo laban sa Barako Bull at Barangay Ginebra nitong weekend.

Ang kanyang impresibong laro ay napansin kaya iginawad sa kanya ang PBA Press Accel-PBA Press Corps Player of the week para sa linggong Nov. 24-29 kung saan tinalo niya si Alaska forward Vic Manuel para sa citation na ito.

Laban sa Barako Bull, ang six-footer na si Cruz ay nagtala ng 23 points, matapos ipasok ang walo sa kanyang 10-tira upang ihatid ang Rain or Shine sa 110-104 panalo.

Makalipas ang 2-araw, kumamada si Cruz ng 16 points, karamihan ay sa drives upang ihatid ang Elasto Painters sa 94-86 panalo laban sa Barangay Ginebra Kings para makasiguro ng quarterfinal seat.