Kondisyon na kondisyon si Pacquiao

MANILA, Philippines – Hindi ugaling tumaya ng batikang trainer na si Freddie Roach.

Pero sa labang haharapin ni Manny Pacquiao kontra sa walang talong si Chris Algieri ay handa niyang isugal ang lahat na hindi aabot sa limang round ang 12-rounds na laban ng Pambansang Kamao.

Sa tingin ni Roach, magandang-maganda ang kon-disyon ni Pacman sa pagdedepensa ng hawak na WBO welterweight division sa Nobyembre 23 sa Macau.

“When I arrived in General Santos over a month ago, Manny did 12 rounds of mitts and that was our first workout in the gym. He’s doing great in sparring.  We brought in a lot of sparmates to keep him busy, to make him think. Conditioning will be the key in this fight because we expect Algieri to be in excellent condition,” wika ni Roach.

Ang mga sparmate ni Pacquiao ay  sina Stan Martyniouk, Viktor Postol at Mike Jones. Noong Huwebes, pinatumba ni Pacquiao si Martyniouk sa sparring. Dumugo naman ang ilong ni Postol sa isang workout.

Hindi naman nagulat ang six-time Trainer of the Year sa inabot ng mga sparmates ni Pacman dahil kahit siya ay nararamdaman at nasasaktan kapag tinatamaan ng suntok gayong may pananggalang na siya sa katawan.

“I put on the body shield and Manny pounds away. Of course, I get bruised, my hands are banged up after we do the mitts. But that’s okay, I want Manny working his combinations,” dagdag nito.

Hanap ni Pacman ang kumbinsidong panalo para maipakita na tunay na naibalik na niya ang matinding lakas na pinagdudahang nawala nang matalo ng dalawang sunod noong 2012.

Sakaling mapatulog ni Pacman si Algieri, posibleng mapapayag na ang pound-for-pound king na si Floyd Mayweather Jr. na harapin ang Filipino boxing pride at 8-division world champion sa kinasasabikang laban sa susunod na taon.