DLSU, NU cagebelles nakapagpakondisyon

MANILA, Philippines - Nakondisyon ang defending champion De La Salle at National University para sa nalalapit nilang finals rematch nitong weekend matapos magsipagpanalo sa UAAP Season 77 wo-men’s basketball tournament na nagpatuloy sa Blue Eagle Gym.

Umiskor si Trisha Piatos ng dalawang free throws sa huling 3.3 segundo ng laro nang takasan ng Lady Archers ang Far Eastern University, 46-43, habang nagtala si Shelley Gupilan ng 25 points nang pasad-sarin ng Lady Bulldogs ang University of the Philippines, 57-44.

Ang La Salle at ang National U ay parehong may malinis na 6-0 record at maghaharap sila para sa solo liderato sa Linggo sa Katipunan venue.

May stanza si April Siat na dalhin sa kalama-ngan ang Lady Tamaraws ngunit hindi pumasok ang kanyang tira sa huling 13 segundo ng labanan na nagbigay daan sa dalawang free throws ni Piatos tungo sa panalo ng Lady Archers. 

Nagposte si Nicole Garcia ng double-double na 15 points at 11 rebounds habang si Piatos ay may 10 points, five boards at three assists para sa La Salle.

Sa iba pang laro, iginupo ng University of Santo Tomas ang University of the East, 69-54, habang pinadapa ng Adamson University ang Ateneo, 59-47 para sa 3-3 record. 

Nalasap ng Lady Warriors, Lady Tamaraws at Lady Eagles ang ikaapat na sunod na talo habang ang Lady Maroons ay bokya pa rin sa 0-6 karta.