Hagdang Bato pinakamahusay na kabayo ng 2012
MANILA, Philippines - Tinapos ng Hagdang Bato ang kampanya sa 2012 bitbit ang P4.6 milyon mula sa dalawang stakes races na sinalihan sa buwan ng Disyembre.
Naunang nagdomina ang premyadong kabayo sa Philippine Charity Sweepstakes Office (PCSO) Presidential Gold Cup noong Disyembre 9 na nagkahalaga ng P4 milyon bago tinapos ang taon bitbit ang dominanteng panalo sa Philracom Grand Derby Stakes Race noong Disyembre 29 para sa P600,000.00 premyo.
Sa kabuuan, ang kabayong may lahing Quaker Ridge sa inahing Fire Down Under ay hindi natalo sa 11 takbo at nagkamal ng halos P13.6 milyon.
Bukod sa Gold Cup, dinomina rin ng Hagdang Bato ang prestihiyosong Triple Crown upang matapos ang isang dekada sa paghihintay ng isang kabayo na dodominahin ang tatlong yugtong karera na pinaglalabanan sa mga distansya na 1,600m, 1,750m at 2,000m.
Huling kabayo na nakawalis sa tatlong titulong pinaglabanan ay ang Silver Story noon pang 2001.
Ang kabuuang kita na napanalunan ng Hagdang Bato ay malayung-malayo sa nakuha ng Magna Carta, ang pinakamahusay na kabayo noong 2011, na umabot lamang ng mahigit P8 milyon.
Ang pagkakasungkit ng P500,000.00 nang pumangatlo sa Gold Cup ang magtutulak sa Magna Carta sa ikalawang puwesto.
Bago ang karerang ito, ang panlaban ni Michael Dragon Javier ay nasa ikatlo sa P3,750,658.39 premyo at napag-iwanan lang ng bahagya ng Humble Riches sa P4,126,005.05.
Napahinga na ang Humble Riches sa buwan ng Disyembre.
- Latest
