Viloria handa na kay Marquez

MANILA, Philippines - Napag-aralan na ni Filipino world flyweight champion Brian ‘The Hawaiian Punch’ Viloria ang lahat ng galaw ni Mexican flyweight tilist Hernan ‘Tyson’ Marquez at alam niyang mananalo siya sa kanilang paghaharap bukas sa LA Sports Arena sa Los Angeles, California.

Ito ang sinabi kahapon ni Viloria sa kanilang pinakahuling press conference ni Marquez bago ang kanilang unification championship fight.

“I know all of Tyson’s moves and I have the ideal style to beat him because Marquez is always coming forward and his movements are very predictable,” sabi ng 31-anyos na si Viloria sa 24-anyos na si Marquez.

Ilang Pinoy boxers na ang nakalaban ni Marquez, kabilang dito sina unified world super bantamweight king Nonito ‘The Filipino Flash’ Donaire, Jr. na tumalo sa kanya at si Richie Mepranum na kanyang binigo.

“I’m going to do my work, going to box with class, with intelligence, and I’ll win the fight round by round. At the end I’ll do my Hawaiian dance like I do every time I win,” ani Viloria. 

Ayon kay Marquez, hindi niya hahayaang sumayaw si Viloria, ang kasalukuyang WBO flyweight titlist, ng Hawaiian hula kagaya ng ginagawa nito sa tuwing mananalo.

“You will have no victory or dance because I will be taking those two belts to Mexico,” sabi ni Marquez, ang WBA flyweight title-holder.

Bitbit ni Viloria ang kanyang 31-3-0 win-loss-draw ring record kasama ang 18 knockouts, samantalang taglay ni Marquez ang kanyang 34-2-0 (26 KOs) card.

Si Filipino world eight-division champion Manny Paquiao ang uupo sa ringside at magsisilbing commentator para sa GMA Channel 7 at sa Mexican broadcast station na Azteca 7.

Nasa undercard ng Viloria-Marquez unification fight ang non-title bout nina Filipino Drian Francisco (23-1-1, 18 KOs) at Mexican Javier Gallo (18-5-1, 10 KOs).