“Eli Grotto Garden sa Busay”

Agay! Akong dakong kalipay nga ihukad ko na kaninyo sugod karong adlawa ang laing hugna sa akong mga pagpaambit sa mga lugar nga atong nalaagan ug naadtuan sa nakalabay’ng mga adlaw. Mga lugar nga sigurado gyud pud nga maghinam-hinam mong sud ungon sa umaabot nga mga panahon.

Kapin sa lima ka tuig na kong nahimong miyembro sa Eli Grotto. Usa kini ka religous group sa mga Roman Catholic believers kansang nag-unang tuyo mao ang pag-abag sa usa’g-usa ug ang pagtabang sa matag miyembro nga mapalambo pa ang ilang mga pagtuo ug relasyon sa Ginoo. Kini gipanguluhan ni Ralina “Ayen” Del Mar kansang gi konsidera sab namong spiritual healer.

Niadtong nakalabay’ng Domingo, nagpahigayon mi og misa sa Eli Grotto Garden sa Babag Dos, Busay, kung diin nahimutang ang gamay’ng retreat house ug giant image ni Mama Mary. Ang misa gipanguluhan ni Father Henry Ponce. Si Father didto na ma assign sa Lebanon ug nibakasyon lang siya dinhi sa Pilipinas aron makita sab og balik ang iyang inahan nga si Sister Adela, usa sab sa miyembro sa Eli Grotto.

Mga kabanatay, alang kanako lahi gyud nga kalipay ang akong pagabation matag panahong mosud-ong ko niining maong lugar. Gawas sa ka balaanon sa maong lugar, relaxing sab kaayo kini sanglit anaa kini mag-tungtung sa ibabaw sa bungtud sa Busay. Ang preskong hangin, ang awit sa mga langgam ug ang taghuy sa mga mananap maoy imong masinati sa panahong anaa ka dinhi.

Tungod niini siguradong ma-relax gyud not just your body, but your inner soul as well. Ang maong lugar gimugna alang sa mga miyembro sa Eli Grotto apan kun kinsa kadtong gustong mopahinongud sa ilang mga pag-ampo ug gustong mobisita dinhi, pwede ra kaayo basta maatlan lang nga naa si ate Ayhen sa maong lugar.

Kun mangutana mo unsaon pag-anhi dinhi, sayon ra kaayo. Gikan sa J. Y. Mall sa may Salinas Drive Lahug, sakay ra mo’g habal-habal paingon sa Babag Dos Busay, moplete lang mo’g 70.00 ug inyo nang masinati ang kaanindot sa lugar sa Eli Grotto.

Na hala! Hangtud sunod semana na pud pohon. Kung asa na pod ta mag-lakwatsa, mao kanay angayan ninyong atangan!