Sa nagpadayong Ms. Philippines Earth, Miss Boljoon nakaangkon og dakong pangos

CEBU, Philippines - Wa mapiog ang determinasyon ni Ms. Boljoon Jessa Marie Cariaga nga maangkon ang kadaugan sa Ms. Philippines Earth 2013 bisan pa man sa aksidente nga iyang nahiaguman pipila ka gutlo sa wala pa sugdi ang cultural wear presentation niadtong miaging semana.

Tungod sa pagkatangtang sa strap sa iyang sapatos nga gipasul-ob sa ilang sponsor, nalup-og si Jessa sa stage atol sa ilang rehearsal nga maoy hinungdan sa dakong pangos sa iyang tuhod. “As in sakit kaayo kay dako man jud ang akong pangos. Taas baya ang heel sa akong sapatos, almost 6 inches, mao nga pagkatangtang sa strap, natikluhod ko, dayon nalup-og. Nag-una man ang akong duha ka tuhod ug maayo kaayo ang pagkabagnos ani sa sawog,” pagtin-aw sa beauty queen nga gipaluyohan sa Olive-C. Finalist si Jessa sa Ms. Olive-C Campus Model Cebu 2011.

Pagka-gabii sa rehearsal mao na ang ilang cultural wear competition. “Bisan sakit kaayo ako jud gi-agwanta kay aron mahatagan nako’g maayong representation ang Cebu and, particularly, ang Boljoon,” dugang sa dalaga nga nakadaug nga Queen of Chef Guevarra’s.  “Hinaut nga padayon mong magsuporta nako ug sa ubang mga Sugbuanong kandidata kay naninguha jud mi nga maka-place sa Ms. Philippines Earth 2013,” kinasingkasing nga hangyo ni Jessa. Mapasalamaton usab ang Cebuana beauty sa iyang mga sponsor nga sila si Cebu South Cong. Tomas Osmeña, Boljoon Mayor Glenn Aparis, Mr. Rodskie Cuison, Mark Yap, Gretchen Sy, Olive-C, ug ni Rich ug Rodel sa Moonwalk Cebu; ug sa iyang mga designer nga sila si Aldwin Guardiana Ornopia (cultural wear, pre-pageant gown), Kenneth Harrion (coronation night gown), Cyrus Velasco (cocktail attire ug resort wear), ug Ryan Dumago (casual wear). Sa padayon nga medal tally, apil sa Top 10 highest medal earners si Jessa out of the 48 finalists. Pabiling nag-una si Ms. Sogod Lucena Rose Magdadaro, samtang anaa sa ikaduhang pwesto si Ms. Cebu City Stephanie Llamada kinsa nakaangkon og bronze medal sa cultural show competition. Ipahigayon ang coronation night karong May 19, 2013, 7pm, sa SM Mall of Asia Arena. Free admission ang coronation night busa siguradong magdasok gyud ang manan-away bisan pa man sa kadako sa venue. Aduna kini delayed telecast sa ABS-CBN Sunday’s Best. (BANAT NEWS)