Rizzini Alexis Gomez Garbo sa Sugbo, inspirasyon sa kababayen-an

CEBU, Philippines - Dili mahadlok ug dako og matabang ang pagbansaybansay aron magmalampuson sa usa ka butang.

Mao kini ang prinsipyo nga gibarugan sa Sugbuanon nga si Rizzini Alexis Gomez kinsa milangkat sa titulong Miss Tourism International nga gipahigayon didto sa Malaysia niadtong katapusang adlaw sa 2012.

Tsika pa ni Rizzini nga dako kaayo og natabang kaniya ang nangagi nga mga indigay nga iyang gisalmotan dinhi sa Sugbo kaniadto.

Aminado ang 22- anyos nga registered nurse nga makatabang og samot sa promosyon ang iyang titulo sa Mutya ng Pilipinas.

Si Rizzini maoy kasamtangang naghupot sa titulo Mutya ng Pilipinas Tourism 2012 hinungdan nga siya ang napadala isip representante sa Pilipinas sa Miss Tourism International.

“Akong responsibility karon mao ang pagtabang og promote sa tourism, dili lang kay sa Pilipinas, apil na pud ang ubang country,” suma pa ni Rizzini kinsa misaysay nga ang Malaysia maoy pilot area alang sa nagkadaiyang kalihukan nga dunay kalabotan sa iyang titulo isip Miss Tourism International.

Ang nakanindot sa titulo ni Rizzini kay gawas sa pag-ugmad sa turismo, mosalmot usab siya og mga kalihukan nga manalipod sa kalikupan sama sa tree planting ug uban pa.

Matud pa niya nga dili basta-basta ang iyang kaagi sa pagsalmot sa Miss Tourism International gumikan kay gisaulog niya ang Pasko ug Bag-ong tuig didto sa Malaysia.

Naandan na gyud nga himoon sa new year’s eve ang maong indigay sa kaanyag kung diin lakip sa programa mao ang countdown.

“First time gyud tu nako nga dili nako kauban akong family sa Christmas ug New Year ,” matud pa ni Rizzini.

Nagkanayon si Rizzini nga wala siya magdahom sa iyang kadaugan gumikan kay nalantawan niya nga puros guwapa ug mga lig-on ang ubang kandidata.

Apan nahugyaw ang mga hurado sa iyang tubag atol sa Q and A portion sa maong indigay sa dihang giingnan siya nga maghingan og festival sa Pilipinas ug unsa ang naka-unique niini.

Gitubag ni Rizzini nga usa sa labing importante nga festival sa Pilipinas mao ang  Sinulog Festival nga gihulagway niya nga “one of the grandest and most colorful festivals in the Philippines.”

Suma pa niya nga ang naka-unique niini mao ang hugot  nga debosyon sa mga Pinoy ngadto sa Balaang Bata nga si Señor Sto. Niño

Dugang pa niya nga ang Sinulog maoy simbolo sa kultura sa mga Sugbuanon , panaghiusa sa tanan ug pag-ugmad sa tradisyon .

Si Rizzini anak ni UC Webmaster coach ug kanhi PBA hotshot nga si Ruel Gomez.

Aktibo si Rizzini sa pagsalmot kaniadto og mga indigay sa eskwelahan busa nahanas na kaayo ang iyang pagpaso sa entablado.

Nimarka usab ang iyang pangalan niadtong 2008 human siya nakoronahan isip Miss Mandaue ug gisundan usab kini sa Miss Cebu niadtong 2009 kung diin siya ang napili nga first runner-up.

Nagmaya usab ang mga Sugbuanon niadtong 2010 gumikan kay siya ang nahimong representante sa dakbayan sa Sugbo sa Miss Aliwan Festival Queen ug siya maoy nakaangkon sa korona.

Dakong garbo alang kang Rizzini ang pagkaangkon niya og titulo sa international pageant sanglit siya maoy ikaduhang Pinay nga nakalangkat sa maong titulo sukad nagsugod ang maong indigay sa kaanyag niadtong 1994. Ang unang Pinay nga nakoronahan isip Miss Tourism International mao si Maria Esperanza niadtong 2000.

Tambag ni Rizzini ngadto sa mga babaye nga gusto mahisama kaniya , “ Dapat dili mo mauwaw, salig gyud mo sa inyong kaugalingon ug dili gyud kalimtan ang pag-ampo”.

Nagkanayon si Rizzini nga sa higayon nga mahuman na ang iyang usa ka tuig nga responsibilidad sa Miss Tourism International, target niya nga mag-masteral ug iyaha nga i-apply ang iyang propesyon isip nurse.

Naghinam-hinam na usab siya karon sa iyang pagsayaw sa grand finale sa Sinulog 2013 karong Enero 20, diin siya maoy modala isip Reyna Juana.

Matud pa nga iyang sul-ubon ang iyang korona sa kasamtangan niya nga titulo atol sa maong production number.

Samtang ang usa sa mga sakop sa komitiba sa Mutya ng Pilipinas nga si Jefferson Tan mipadayag nga usa karon si Rizzini sa tataw nga ebidensya nga nagpabilin gihapon ang sidlak sa Mutya.

Matud pa ni Jefferson nga gihimo na karon ang proseso sa posibilidad nga ipahigayon sa Sugbo partikular na diha sa Dakbayan sa Mandaue ang pageant karong tuiga.

Dugang pa niya nga duna na sila’y pasiunang panag-istorya ni Mayor Jonas Cortes ug mihangop kini sa nahisgutang plano. Nagkanayon si Jefferson nga garbo sa Sugbo si Rizzini hinungdan nga nahaom gyud ang maong plano.

Matud pa niya nga nagpaila lang kini nga dili pud basta-basta ang mga Sugbuanon kung hisgutan na ang indigay sa kaanyag.