18 pulis tinamaan ng COVID-19, istasyon ni-lockdown
TUGUEGARAO CITY , Philippines — Isinailalim sa “indefinite lockdown” ang police station ng Enrile, Cagayan matapos magpositibo sa COVID-19 ang 18 na opisyal at tauhan na tumatao sa gusali nito at isang 15-anyos na dalagitang nasa kanilang kustodya kahapon.
Sinabi sa Pilipino Star NGAYON (PSN) ni Cagayan Governor Manuel Mamba na unang nagpositibo noong Sabado ang dalawang imbestigador ng nasabing istasyon na nakahawa sa 16 pa nilang kabaro na lumabas ding positibo sa virus kahapon.
Ayon kay Mamba, nahawa sa isang kawani ng Department of Social Welfare and Development (DSWD) ang dalawa habang sinisiyasat nila ang kasong rape ng isang menor-de-edad na nasa pangangalaga ng naturang kagawaran.
Naunang nagkaroon ng exposure ang taga-DSWD sa mga kapwa niya kawani sa munisipyo na nagka-COVID nitong mga naunang linggo ng Oktubre.
Dahil sa hawaan sa pamahaalang bayan, isinailalim ng pamunuan ni Mayor Miguel Decene ang Enrile sa modified enhanced community quarantine (MECQ) mula Oktubre 6 hanggang 21. May 20 kawani ng munisipyo ang napaulat na nagpositibo sa COVID-19.
Samantala, pinadala ng Cagayan Police Office ang augmentation force upang humalili sa mga nagpositibo nilang kabaro habang ang iba pa ay naghihintay ng resulta ng kanilang swab test na lalabas sa linggong ito.
- Latest