Retiradong pulis, itinumba

CAVITE , Philippines  —   Itinumba ang 52-anyos na retiradong pulis matapos itong ratratin ng hindi kilalang lalaki sa pag-aaring car display center sa Barangay Palico 4, Imus City sa Cavite kahapon ng tanghali.

Napuruhan sa likurang bahagi ng katawan ang biktimang si Cornelio Lindon Bugayong, may asawa, at residente ng Barangay Poblacion1-A sa nasabing lungsod.

Sa imbestigasyon ng pulisya, bandang alas-12 ng tanghali nasa car display center sa kahabaan ng Aguinaldo Highway ang biktima nang lapitan at pagbabarilin.

Narekober sa crime scene ang cal.45 pistol na pag-aari ng biktima, at 3 basyo ng bala ng cal. 45 pistol.

Inaalam ng pulisya kung may kaugnayan sa negosyo ng biktima ang naganap na pamamaslang.