Alinsug bumida sa NU
Lady Bulldogs amoy na ang korona
MANILA, Philippines — Isang kembot na lang at masisilo ng defending champion National University ang korona matapos sakmalin ang De La Salle University, 25-17, 25-21, 13-25, 25-17 sa Game 1 ng UAAP Season 87 women’s volleyball tournament best-of-three finals na nilaro sa Smart Araneta Coliseum kagabi.
Hinugutan ng puwersa ni head coach Sherwin Meneses si Evangeline Alinsug na nagtala ng career-high 21 points, lahat galing sa spikes upang mapalapit sa pagsilo ng pangatlong titulo sa apat na seasons.
Ipinaramdam ng Lady Bulldogs ang kanilang bangis sa unang dalawang sets, matapos makipagtulungan si Alinsug kina Mhicaela “Bella” Belen at Alyssa Mae Solomon.
Binulaga naman ng La Salle ang NU sa set 3, nang magliyab agad sa opensa ang una, nahawakan nila ang 11-point lead, 17-6 bago tinapos ang laro at makahirit ng set 4.
Pero naniguro ang Lady Bulldogs, hindi na nila pinaporma ang Lady Spikers, maliban kina Alinsug at Belen ay humataw din sa opensa sina Alyssa Solomon, Alexa Nichole Mata at Erin May Pangilinan.
“Yung game naman hindi natin masabi, talagang yung situation sa third set kailangan lang naming tanggapin then bawi ng fourth set,” ani Meneses.
Nag-ambag si Belen ng 19 markers mula sa 17 attacks at dalawang service aces para sa NU na pagkakataon nilang makuha ang back-to-back titles sa Miyerkules sa SM Mall of Asia Arena.
Nirehistro ni Solomon ang siyam na puntos habang may pito at anim ang binakas nina Mata at Pangilinan para sa NU, ayon sa pagkakasunod.
Tumikada naman si Canino ng 22 markers habang tumipa si Shevana Maria Nicola Laput ng 16 points kasama ang 11 kills, apat na blocks at isang service ace pero hindi pa rin sa apat para itaguyod sa panalo ang Taft-based squad.
- Latest
