TNT nakauna

MANILA, Philippines — Dumaan muna sa butas ng karayom ang TNT Tropang Giga bago maitakas ang 88-84 panalo sa Rain or Shine sa Game One ng kanilang semifinal series sa Season 49 PBA Commissioner’s Cup kahapon sa Smart Araneta Coliseum.

Kumamada si Jayson Castro ng 24 points tampok ang anim na three-point shots para sa 1-0 lead ng Tropang Giga sa best-of-seven showdown nila ng Elasto Painters.

“Siguro kung ano lang iyong ibinibigay ng defense iyon lang ang kinukuha ko,” wika ng 38-anyos na veteran guard. “Kailangan mag-contribute sa scoring.”

Humakot si import Rondae Hollis-Jefferson ng 23 markers, 13 rebounds, 5 assists at 4 blocks at may 22 points si Calvin Oftana kasama ang anim na triples.

“Rondae shot really poorly, not even hitting 30 percent of his field goals. So it is important that other guys step up,” ani TNT coach Chot Reyes kina Castro at Oftana.

Binanderahan ni import Deon Thompson ang Rain or Shine sa kanyang 29 points at 16 boards.

Ang dalawang free throws ni Keith Datu ang nagbigay sa Elasto Pain­ters ng 37-28 abante sa second period bago nagpaulan ng apat na tres si Oftana para sa 51-47 halftime lead ng Tropang Giga.

Nagpalitan ng bentahe ang dalawang koponan sa second half bago kinuha ng TNT ang 87-82 kalama­ngan sa huling 2:34 minuto ng fourth quarter.

Huling nakalapit ang Rain or Shine sa 84-87 sa 1:59 minuto matapos ang dalawang foul shots ni Andrei Caracut.