Celtics dinispatsa ang Cavs sa Game 5
BOSTON —- Kumolekta si Jayson Tatum ng 25 points at 10 rebounds sa 113-98 pagsibak sa Cleveland Cavaliers sa Game Five papasok sa Eastern Conference finals.
Isinara ng Boston sa 4-1 ang kanilang semifinals series ng Cleveland patungo sa ikatlong sunod na conference finals at lalabanan ang mananaig sa semis duel ng New York Knicks at Indiana Pacers.
Angat ang Knicks sa Pacers, 3-2.
Humakot si Al Horford ng 22 points, 15 rebounds at 5 assists para sa Celtics na nagsalpak ng 19 three-point shots habang may 18 at 13 markers sina Derrick White at Jrue Holiday, ayon sa pagkakasunod.
Pinamunuan ni Evan Mobley ang Cavaliers sa kanyang playoff career-high 33 points at may 25 markers si Marcus Morris Sr. tampok ang limang triples.
Naglaro ang Cleveland na wala sina injured All-Star Donovan Mitchell (calf), center Jarrett Allen (rib) at key reserve Caris LeVert (knee).
Naiwanan ang Boston sa 40-46 sa second quarter bago agawin ang 58-52 halftime lead na kanilang pinalobo sa 101-87 sa 6:44 minuto ng fourth period.
Sa Oklahoma City, nagposte si Luka Doncic ng 31 points, 11 assists at 10 rebounds para sa kanyang ikaanim na career playoff triple-double sa 104-92 panalo ng Dallas Mavericks sa Thunder sa Game Five at kunin ang 3-2 lead sa Western Conference semifinal series.
Kumamada si Derrick Jones Jr. ng playoff career-high 19 points at nagtala si P.J. Washington Jr. ng 10 points at 10 rebounds para sa pagbangon ng Dallas sa kabiguan sa Game Four.
Binanderahan ni Shai Gilgeous-Alexander ang Oklahoma City sa kanyang 30 points.
- Latest
