'Track queen' Lydia de Vega kritikal konsidyon dahil sa breast cancer
MANILA, Philippines — Kasalukuyang kritikal ang kondisyon ng Filipina sports legend at track and field queen na si Lydia De Vega dahil sa mga komplikasyon dulot ng stage 4 breast cancer.
Sa isang paskil, nanawagan ang anak ng 57-anyos na atleta na si Stephanie “Paneng” Mercado-de Koenigswarter para ipagdasal ang kanyang ina.
Nanawagan din siya para sa pinansyal na tulong para sa kanilang pamilya.
"My dearest mother, Lydia de Vega, is in very critical condition due to complications caused by her Stage 4 Breast Cancer condition. She was diagnosed with this in 2018 and has been silently fighting the disease for the past 4 years," saad niya, Miyerkules.
Ani Stephanie, mabilis ding lumalala ang kondisyan ng kanyang ina.
"As the disease is progressing, her condition is quickly worsening despite undergoing many procedures including brain surgery," pahayag niya.
"I am requesting everyone to please pray for her in this desperate time of need. If anyone would like to assist financially to cover her medical expenses, any donation would be deeply and whole-heartedly appreciated."
Isa si De Vega sa mga pinakatanyag na atleta sa bansa na siyang kinilalang "fastest woman in Asia" noong 1980s matapos manguna sa 100-meter dash sprint race sa Asian Games noong 1982 at 1986. Nagsilbi ring kinatawan ng Pilipinas ang atleta sa Olympics noong 1984 and 1988.
Taong 1994 nang magretiro ang atleta.
Noong 2019 nang huling lumitaw sa publiko si De Vega na siyang kabilang sa mga nagsilbing flag bearers sa opening ceremony ng 30th Southeast Asian Games sa Philippine Arena
Tulong mula PSC
Kaugnay nito, mag-aabot ng tulong ang Philippine Sports Commission (PSC) para sa pamilya ni De Vega.
Ani PSC officer-in-charge Guillermo Iroy, nakikipag-ugnayan na siya kay Stephanie bago pa nito isapubliko ang kondisyon ng kanyang ina.
"Since Monday, I’ve been coordinating with Paneng, her daughter. PSC will extend assistance,” sambit ni Iroy.
Pagbabahagi niya, inutusan din siya ni Pang. Ferdinand "Bongbong" Marcos Jr. na magpaabot ng tulong kay De Vega.
“PBBM also instructed me to extend necessary assistance when I reported to him during the courtesy call of the PNWFT,” aniya. — Philstar.com intern Vivienne Audrey Angeles, may ulat mula Spin.Ph
- Latest
