Pinay Spikers inaalat sa AVC tourney

MANILA, Philippines — Patuloy na inaalat ang Choco Mucho nang magtamo ito ng 22-25, 19-25, 15-25 desisyon sa Zhetysu-Kazakhs­tan sa 2021 AVC Asian Women’s Club Volleyball Championship kahapon sa Nakhon Ratchasima, Thailand.

Winakasan ng Choco Mucho ang group stage bitbit ang 2-0 baraha.

Nauna nang natalo ang Choco Mucho sa Nakhon Ratchasima-Thailand, 11-25, 26-28, 17-25, sa unang araw ng bakbakan noong Biyernes.

Dahil ito, mapapalaban ang Pinay Spikers sa No. 2 seed sa quarterfinals.

Sa katunayan, maganda naman ang simula ng Pinay Spikers sa bawat set partikular na sa tuwing nasa frontline sina Filipino-American Kalei Mau at Mylene Paat.

Ngunit hindi masabayan ng Choco Mucho ang mainit na intensidad ng Zhetysu sa huling bahagi ng set para tuluyang lasapin ang ikalawang sunod na pagyuko.

Nakipagsabayan ang Choco Mucho sa blocking department matapos makalikom ng walong blocks para pantayan ang walo ring blocks ng Zhetysu.

Subalit nakaungos ang Zhetysu sa attacks nang mag­pako ito ng 48 kills laban sa 33 ng Pinay squad.

Lamang din ang Zhetysu sa service area, 4-1.