GIn kings lalapit sa finals

MANILA, Philippines — Sa pagkakaroon nila ng two-day break ay inaasahan ni head coach Tim Cone ng nagdedepensang Barangay Ginebra na magpipilit ang Meralco ni mentor Norman Black na makabangon mula sa 0-2 pagkakabaon sa kanilang championship series.

“They're a tough mental team. They're mentally tough and very hard to crack. I think they still have a lot of punches left to throw at us,” sabi ng two-time PBA Grand Slam champion coach.

Bitbit ang 2-0 bentahe, pipilitin ng Gin Kings na makalapit sa pagwalis sa Bolts sa Game Three ng 2017 PBA Governor's Cup Finals ngayong alas-7 ng gabi sa Smart Araneta Coliseum.

Itinumba ng Ginebra ang Meralco sa Game One, 102-87 noong Biyernes at sa Game Two, 86-76 noong Linggo para mapalakas ang tsansang maidepensa ang titulo ng season-ending conference.

Sa 42-taong kasaysayan ng PBA, ang 30 sa 36 koponang humawak ng 2-0 abante sa isang title series ay dumiretso sa pagkopo sa korona.

At maaaring mapabilang dito ang Gin Kings sakaling tuluyan nang mawalis ang Bolts sa kanilang best-of-seven titular showdown.

“We beat them two in a row, but they can certainly beat us two in a row,” babala ng 59-anyos na si Cone sa Ginebra na muling ibabandera sina import Justin Brownlee, LA Tenorio, Best Player of the Conference Greg Slaughter, Japeth Aguilar, Joe Devance at Scottie Thompson.

Bagama't nalubog sa 0-2 sa serye ay kumpiyansa pa rin si Black na maka­kabangon ang Meralco.

“We’re still alive. Until they won four games, we’ll be out there fighting,” wika ng one-time PBA Grand Slam mentor.

Ayon sa 59-anyos na si Black, kulang na kulang ang local support kay two-time PBA Best Import Allen Durham sa naturang dalawang kabiguan ng Bolts sa Gin Kings.

“No question, our locals need to step up a little bit to support Allen (Durham) and make their shots. That’s r­eally the problem right now,” wika ni Black, sasandig kina Durham, Ranidel De Ocampo, Chris Newsome, Baser Amer, Cliff Hodge at Jared Dillinger.