2 boxers umiskor ng gintong medalya
Lawn bowls team nagdagdag ng isa
Kuala Lumpur – Umani ang Team Philippines ng dalawang gintong medalya mula sa boxing team at isa sa lawn bowls sa 29th Southeast Asian Games kahapon sa Malaysia International Trade and Exhibition Center (MITIC) dito.
Nagwagi sina Felix Eumir Marcial at Marvin John Tupas sa magkahiwalay na boxing finals, habang sina Robert Guarin, Emmanuel Portacio Jr., Leoncio Carreon at Ronald Lising ay nanalo sa Men’s Four ng lawn bowls laban sa host Malaysia. 16-14.
Bukod pa rito, nakakuha ng isang silver at apat na bronze ang bansa.
Tinalo ng Fil-British na si Tupas ang hometown bet na si Adli Hafidz Bin Mohd Pauzi sa gold medal match ng light heavyweight division at nanalo naman si Marcial kay Pathomsak Kuttiya ng Thailand sa middleweight class para angkinin ang gintong medalya.
Hindi naman pinalad si Mario Fernandez nang matalo kay Chatchai Butdee ng Indonesia sa finals at nahulog sa silver medal sa bantamweight division.
Dalawang bronze medals din ang naiuwi ng boxing team mula kina Ian Bautista sa flyweight category at Charly Suarez sa light welterweight class.
Ang ibang nakakuha ng tanso ay sina Lois Kaye Go sa golf at Amparo Teresa Acuña sa shooting event.
Kaagad pinatamaan ni Tupas ng isang right straight sa mukha ang kalaban sa unang walong segundo at sinundan ng left at right na suntok sa katawan para tapusin ang laban na may higit pang dalawang minutos ang natira sa first round.
Si Marcial naman ay tumatama ng maraming suntok mula umpisa hanggang matapos ang laban tungo sa unanimous decision win.
Sa athletics, sasabak sa aksyon si 2016 Rio Olympic veteran Marestella Sunang-Torres sa women’s long jump at sina Kay Santos at Melvin Calanosa sa women’s long jump at men’s javelin throw, ayon sa pagkakasunod.
Pangungunahan din ni Eric Shawn Cray ang tropa sa 4x100-meter relays at si Kayla Richardson sa women’s 4x100-meter relays.
Samantala, umabante sa finals ang Philippine men’s hockey team nang talunin ang Malaysia, 2-1, para makalaban ang Thailand.
- Latest