Arcilla, Tierro ikinasa ang finals
MANILA, Philippines – Naisaayos nina Davis Cup veterans Johnny Arcilla at Patrick John Tierro ang pagtutuos sa finals matapos maitakas ang pahirapang panalo sa kani-kanilang karibal sa semifinals ng 35th Philippine Columbian Association (PCA) Open-Cebuana Lhuillier men’s tennis tournament na ginaganap sa PCA indoor shell-clay court sa Paco, Manila.
Kinailangan ng eight-time champion na si Arcilla ng malakas na puwersa upang pigilan ang pagtatangka ni Elbert Anasta tungo sa 6-4, 6-2 desisyon habang dumaan din sa butas ng karayom si Tierro bago itakas ang 6-2, 6-4 panalo laban kay Filipino-Italian Marc Reyes sa hiwalay na semis game.
Nakatakda ang finals alas-2 ng hapon kung saan pakay ni Arcilla na masikwat ang ikasiyam na korona para mapasama sa kanyang mga tropeo noong 2001, 2006, 2007, 2008, 2009, 2011, 2012 at 2013.
Sa kabilang banda, hangad ng 20014 titlist na si Tierro na makuha ang ikalawang korona.
Sa pagpasok sa finals, makasisiguro na ng tiket sa main draw sina Arcilla at Tierro sa PCA Open-Cebuana Lhuillier Asian Tennis Federation (ATF) Tour na gaganapin mula Setyembre 1 hanggang 4 sa parehong venue.
“We continue to support sports events like the PCA Open year after year as Cebuana Lhuillier Sports is committed to empowering Filipino athletes. Projects like this provide a platform that allows us to discover and gauge the potential of our tennis players while giving them the motivation to deliver the best performance,” wika ni Cebuana Lhuillier CEO Jean Henri Lhuillier.
Sa men’s doubles, pasok sa finals ang tambalan nina Arcilla at Ronard Joven, at ang pares nina Anasta at Marc Anthony Alcoseba na namayani sa kani-kanilang karibal sa semis sa torneong suportado ng Philippine Star, Dunlop, Whirlpool, Chris Sports, Mary Grace, Aseana City, PVL Restaurant, Maverick, Compass, Babolat, Fujidenzo, Just Jewels, Rexona, Palm Rock, Coca Cola Femsa Philippines, Pearl Garden Hotel, Pearl Lane Hotel, Sen. Manny Pacquiao, L&M at Monte.
Wagi sina Arcilla at Joven kina Kim Saraza at Joseph Arcilla, 6-2, 6-0, habang namayani sina Anasta at Marc Anthony Alcoseba kina Tierro at Jed Olivarez Jr., 7-5, 6-3.
Ang magkakampeon sa men’s doubles ay mabibiyayaan ng tiket sa main draw ng ATF Tour.
Nakalaan ang P50,000 sa maghahari sa men’s singles at P25,000 sa runner-up habang ang mangunguna sa doubles ay magkakamit ng P20,000 at P10,000 naman sa runner-up.
- Latest
