DOH bineberipika 6 nasawi sa matinding init
MANILA, Philippines — Patuloy pa rin umanong biniberipika ng Department of Health (DOH) ang ulat na anim na indibidwal ang namatay dahil sa mga heat-related illnesses, bunsod na rin ng matinding init na nararanasan ngayon sa bansa.
Ayon kay DOH Secretary Teodoro Herbosa, nagsasagawa na sila ng imbestigasyon upang matukoy kung matinding init nga ba talaga ang ikinasawi ng mga naturang indibidwal.
Batay sa ulat ng Event-Based Surveillance and Response System ng DOH noong Abril 22, nakagpagtala na sila ng 34-kaso ng heat-related illnesses mula Enero 1 hanggang Abril 8, 2024.
Sa naturang bilang, anim ang iniulat na bawian ng buhay.
Nagpahayag naman ng paniniwala si Herbosa na posibleng mas marami pang indibidwal ang apektado ng heat-related illnesses ngunit hindi lamang ito naitatala.
Paliwanag ng kalihim, karaniwan nang hindi naman nagtutungo sa pagamutan ang mga pasyente ng mga heat-related illnesses.
Tanging ang mga may malalang karamdaman lamang aniya gaya ng heat stroke at heat exhaustion ang nagpapadoktor.
“The ones that go to us are already the severe type, which is heat stroke or heat exhaustion,” aniya pa.
Mahigpit naman ang payo ni Herbosa sa mga mamamayan na pag-ingatan ang kanilang kalusugan ngayong matindi ang init ng panahon upang makaiwas sa matinding karamdaman.
- Latest
