8K paaralan, sinira ng lindol

Balik-eskuwela baka mapurnada

MANILA, Philippines — Mahigit 8,000 paaralan ang apektado nang yanigin ng magnitude 7 na lindol ang Abra at iba pang ba­hagi ng Luzon, kamakalawa.

Ayon sa DepEd sa na­sabing bilang, 35 ang ma­tinding napinsala na mula ?sa 15 school division offices sa Luzon habang 11 sa mga naturang paaralan ang mula sa Region III (Central Luzon), siyam sa Region II (Cagayan Valley), walo sa Cordillera Administrative Region (CAR ), at pito sa Region I (Ilocos Region).

Sa pagtaya naman ng DepEd-Disaster Risk Reduction and Management Service (DRRMS), ang estimated cost para sa reconstruction at rehabilitasyon ng mga napinsalang paaralan ay aabot sa P228.5 milyon.

Samantala, ang 8,027 namang apektadong paaralan ay yaong mga matatagpuan sa mga lugar na nasa ilalim ng instrumental intensity sa Earthquake Information ng Phivolcs o yaong napaulat na mayroong casualties.

Anang DepEd, dumalo sila sa 1st Response Cluster Meeting at lumahok sa National Disaster Risk Reduction and Management Council (NDRRMC) Virtual Emergency Operations Center upang mai-assess ang sitwasyon ng mga rehiyon na naapektuhan ng lindol.

Nagpatawag na rin ito ng emergency meeting sa mga regional at division DRRM coordinators ng mga apektadong rehiyon upang iprisinta ang mga updates at response actions na isinagawa ng kanilang tanggapan.

Nakipag-ugnayan na rin umano ang DRRMS sa field DRRM coordinators upang makakuha ng updates hinggil sa bilang ng mga mag-aaral, mga guro at mga non-teaching personnel na apekto ng pagyanig.

Matatandaang ang School Year 2022-2023 ay takda nang magbukas ?sa Agosto 22 at magtatapos sa Hulyo 7, 2023.

Magsisimula naman ang limang araw na face-to-face classes sa Nobyembre 2.