Mga COVID-19 positive, pwede pa rin bumoto sa 2022 elections — Comelec
MANILA, Philippines — Hindi masasayang ang boto ng mga tatamaan ng coronavirus disease (COVID-19) sa Mayo 2022, pagtitiyak ng Commission on Elections (Comelec) sa pagdinig ng Kamara ngayong araw.
Habang nasa deliberasyon para sa kanilang mungkahing P26.72 bilyong budget sa susunod na taon, tiniyak ni Comelec chairperson Sherriff Abas na makapagpapasa pa rin ng balota ang mga rehistradong botante na magkakataong positibo sa virus sa Mayo 9 national and local elections.
"Oo naman po. Pwede po silang bumoto," wika ni Abas nang tanungin ni Zamboanga City Rep. Manuel Dalipe, Biyernes.
"But gagawan po namin ng paraan na magkaroon ng parang isolation center sa bawat polling center. So ihihiwalay po natin sila just in case they will be confirmed [positive] and then doon natin sila pabobotohin doon sa isolation center."
Wika pa ng Comelec official, nakikipagtulungan pa sila sa ngayon sa Inter-Agency Task Force for the Management of Emerging Infectious Diseases (IATF-EID) para tuluyan nang maplantsa ang mga alituntunin ng botohan sa gitna ng lumalala pa ring COVID-19 situation.
Hindi naman sing palad ng mga botante ang mga poll servers, na hindi papayagang magtrabaho oras na madali sila ng nakamamatay na virus.
Ayon sa komisyon, 20 araw na lang ang nalalabi bago ang huling araw ng pagpaparehistro para sa eleksyon, bagay na may iba't ibang schedule depende sa umiiral na quarantine restriction sa lugar:
General Community Quarantine (GCQ) at Modified General Community Quarantine (MGCQ): Lunes hanggang Biyernes, 8 a.m. - 7 p.m.; Sabado at holidays, 8 a.m. - 5 p.m.
Modified Enhanced Community Quarantine (MECQ): Lunes hanggang Sabado at holidays, 8 a.m. hanggang 5 p.m.
Today is 10 September 2021 and there are only 20 days before the last day of voter registration! #MagpaRehistroKa na!#VoterCare #NLE2022 #VoterReg2021Countdown pic.twitter.com/N0vJobGsuZ
— COMELEC (@COMELEC) September 10, 2021
Magkakaroon naman ng "nationwide synchronized mall registration day" ngayong Sabado, ika-11 ng Setyembre.
Para sa NCR, maaaring mag-accomodate ng mga aplikante ang Offices of the Election Officer sa hanggang 5 p.m. ng araw na 'yon:
- Robinsons Malls
- Ayala Malls
- SM Supermalls
Una nang tiniyak ni National Capital Region Police Office (NCRPO) Pcol. Luis Maria Pascual sa Comelec at mall partners ang nasa 351 kawani ng pulisya na iude-deploy sa araw na 'yon, para na rin sa "mapayapa at maayos" na pagsasagawa ng voter registration at pagpapatupad ng health and safety protocols.
- Latest
