Malacañang pumalag sa US resolusyon para kay de Lima
MANILA, Philippines — Pumalag kahapon ang Malacañang sa ipinasang resolusyon ng isang panel ng Senado ng United States na humihiling na palayain na ng gobyerno ng Pilipinas si Senator Leila de Lima.
Ayon kay Presidential Spokesperson Salvador Panelo, ang nasabing resolusyon ay pagyurak sa dignidad ng gobyerno ng Pilipinas at ng soberenya ng bansa.
Ayon pa kay Panelo, imposibleng hindi alam ng US Senate Committee na hindi na nila kolonya ang Pilipinas.
Inaprubahan ngayong buwan ng US Senate Committee on Foreign Relations ang Resolution No. 142 na kumokondena sa gobyerno ng Pilipinas dahil sa patuloy na detensiyon ni de Lima. Nanawagan din ang nasabing komite na dapat palayain na ang senadora.
Binanggit din sa nasabing resolusyon ang hindi umano makatarungang judicial proceedings laban sa media at mga mamamahayag partikular kay Maria Ressa ng Rappler.
Ayon naman kay Panelo, dapat maintindihan ng mga miyembro ng Committee on Foreign Relations ng US Senate na sina de Lima at Ressa ay kasalukuyang may mga kinakaharap na mga kasong kriminal.
Sinabi pa ni Panelo na dumaan sa tamang proseso ng criminal prosecution ang mga kaso nina de Lima at Ressa.
Idinagdag din ni Panelo na dapat tanggalin ng mga US senators ang kanilang takip sa mata at pag-aralang mabuti ang mga kaso nina de Lima at Ressa.
Dapat rin aniyang respetuhin ng mga US senators ang judicial process ng bansa katulad ng ipinapakitang pagrespeto ng Pilipinas sa kanila.
- Latest
