P14 milyong shabu ang nasakmit niadtong adlaw nga Domingo

CEBU, Philippines — Niabot ngadto sa P13.6 milyones ang balor sa ginadili nga drugas nga nasakmit sa managlahi nga operasyon sa mga tinugyanan sa Philippine Drug Enforcement Agency Central Visayas sa Dakbayan sa Mandaue ug Lapu-Lapu sa nakalabay’ng adlaw nga Domingo.

Unang operasyon nahitabo sa Mandaue City  diha sa North Reclamation Area, Barangay Subangdako nga gikasikop sa usa ka Fatima Veraces, walay trabaho ug residente sa Barangay Mambaling, Cebu City.

Ang PDEA-7 uban sa NAVFORCEN, PNP-DEG SOU 7, RPDEU 7, MCPO Mobile Patrol Unit, ug MCPO-CIU maoy nipahigayon sa maong operations.

Nasakmit gikan sa maong dinakpan ang 1,500grams nga mobalor og P10,200,000 base sa estimated average market value, buy-bust money, usa ka cellphone ug non-drug evidence.

Sa susamang adlaw gihapon gilusad ang follow-up operation batok sa kapuyo ni Veraces.

Nasikop diha sa Sitio Soong 2, Barangay Mactan, Lapu-Lapu City ang kapuyo ni Veraces nga si William Lopez Jr., 32, walay trabaho.

Nasakmit gikan kaniya ang unom ka putos nga gituohang shabu nga motimbang sa 500 gramos nga adunay P3.4 milyones nga kantidad, buy-bust money, gray multicab, ug mga non-drug evidence.

Ang mga dinakpan giandaman na karon ang pagpasang-at ug tukma nga kalapasan sa Sections 5 and 11, Article Il sa RA 9165.

Samtang laing kinilo nga ilegal nga drugas ang nasakmit sa Regional Police Drug Enforcement Unit (RPDEU) sa Police Regional Office(PRO)-7 gikan sa 48-anyos nga lalakeng wala'y trabaho ug nadakpan sa buy-bust operation sa Quijano Compound, Barangay Calamba, Siyudad sa Sugbo pasado alas 10 sa gabii sa adlaw'ng Domingo.

Ang nadakpan mao si Romelito Ygoña Flores alyas Mitong, 48, residente sa naasoy nga lugar ug usa ka High Value Individual.

Nakuhaan ang suspetsado og 1,525 grams sa gituohahang shabu nga nagkantidad og P10. 3 million.

Sa imbestigasyon sa kapulisan ang suspetsado matod pa maka dispose og 3000 grams sa illegal nga drugas kada semana.

Ang area of operation niini kay dili lang Cebu City apan apil na ang mga silingang siyudad.

Napriso na kaniadto ang suspek ug nakagawas na apan padayon gihapon ang komunikasyon niini sa iyang matud pa contact sa ilegal nga drugas nga naa pa gihapon sa prisohan nga gialyasan og AR.

Kasong kalapasan sa Section 5 ug 11 sa Article II sa Republic Act 9165 ang atubangon sa suspetsado.

Samtang sa operasyon sab sa kapolisan sa Talisay, dul-an sa usa ka milyon ka pesos nga ilegal nga drugas ang nasakmit sa kapolisan sud sa tulo ka adlaw nga sunod-sunod nga operasyon.

Nasikop sab ang 22 ka indibidwal nga nalambigit sa ilegal nga drugas, ilegal nga sugal ug paghupot og armas.

Si Police Lt. Col. Epream Paguyod, hepe sa kapolisan sa Talisay nipatuman sa Oplan Limpyo Talisay sugod sa Mayo 17 hangtud sa Mayo 19.

Sa operasyon, nasakmit nila ang shabu nga mibalor og P851,360 ka pesos ug nakakuha og usa ka .38 nga revolver nga adunay upat ka buhing bala.— Decemay Padilla, Romeo Marantal, Gabriel Bonjoc (BANAT NEWS)