MCWD adunay tulo ka tabay nga makuhaan og supply sa tubig

CEBU, Philippines — Pormal na nga gibuksan sa Metropolitan Cebu Water District (MCWD) ang usa ka pipe nga nagkonektar sa tulo ka deep well sa Barangay Guadalupe, Dakbayan sa Sugbo aron matubag ang kakuwang sa supply sa tubig tungod sa epekto sa El Niño.

Kagahapon, ang board ug management sa MCWD pinangulohan ni Chairman Joey Daluz III ug General Manager Edgar Donoso pormal nga nibukas sa usa ka tubo nga nagkonektar sa tulo ka deep well diha sa nahisgutang barangay.

Sa tulo ka deep well, usa ang opisyal na nga gi-commission sa MCWD ug bag-o lang nalimpiyohan

Sa pagkakaron, nagpadagon pa ang pag-commission sa nahabilin nga duha ka tabay.

Ang maong mga tinubdan sa tubig naggikan kini sa Faelnar Compound, Gabutan Compound, ug Quijada Compound sa maong dapit.

Base sa mga taho nga ang maong mga deep well wala na nag-function sulod sa lima ka tuig ug bag-o lang nga nalimpyohan tungod sa kontaminasyon sa taas nga nitrate.

Ang tulo ka deep well gilaoman nga maka-produce og 2,000 ngadto sa 3,000 cubic meters nga tubig matag adlaw ug maka-cater og 2,500 ka panimalay sa Barangay Guadalupe.

“I am very happy nga kining tulo ka wells operational na og balik, and I hope mahatagan ni og gamay nga relibo sa kakuwang sa tubig”, matud ni Daluz.

Gawas niini, si Daluz nagkanayon nga laing tabay ang ilang gitan-aw sa Lungsod sa Consolacion. (BANAT NEWS)