MCC gipalambo sa kagamhanan sa Mandaue

CEBU, Philippines — Gihangop sa mga tinun-an ug mga nagdumala sa Mandaue City College ang mga kalamboan niini nga natigayon tungod sa kusganong pagsuporta sa kagamhanan sa Dakbayan sa Mandaue.

Nunot niining maong mga kalamboan nga naangkon sa maong tunghaan ilang gipadayag ang pagpasalaamat kang Mayor Jonas Cortes nga nihatag usab og dekalidad nga edukasyon sa mga tinun-an sa maong tunghaan pinaagi sa mga high-tech nga pasilidad nga napahimuslan na karon sa mga tinun-an.

Naglakip sa maong pasilidad ang airconditioned nga computer laboratory, speech laboratory, educational technology room, cyber research library ug traditional library, ug state of the art nga school clinic nga adunay treatment room, isolation room, ug lactating room ug separate ward sa babaye ug lalaki.

Ang mga classroom adunay daghang bentilador aron hamugaway ang pagtuon sa mga tinun-an.                   

Nasayran nga gitinguha usab ni Cortes ang pagpatukod og kaugalingong edipisyo nga magsilbing lawak saringan sa mga tinunan ug kini anha ipahimutang sa luna sa kanhi nahimutangan sa Land Transportation Office (LTO) sa Barangay Looc apil usab unya ang  sikbit nga mga luna niini. (BANAT NEWS)