Socialized housing sa siyudad sa Lapu-Lapu hingpit na nga tokuron

CEBU, Philippines — Gipahibalo ni Lapu-Lapu City Mayor Junard "Ahong" Chan ang hingpit na nga katukoran sa labing unang socialized housing nga mapanag-iya na sa mga informal settlers sa dakbayan.

Kini human sa gihimong pagpinirmahay sa memorandum of understanding (MOU) uban ni Under Secretary Roland Samuel Young sa buhatan sa Department of Human Settlement and Urban Development niadtong miaging adlaw.

Kauban nila ni Mayor Chan ug USec Young sa pinirmahay sa MOU si Kongresista Cindi King-Chan nga gisaksihan usab nila ni Bise Mayor Celedonio Sitoy ug mga sakop sa konseho.

Suma pa ni mayor Chan atol sa press conference nga ang katukoran sa maong socialized housing alang sa mga informal settlers maoy katumanan sa ilang mga saad nga kini mahitabo sa dili pa ang tuig 2025.

Dugang pa niya nga sulod sa unom ka bulan niining tuiga una nga matukod ang 200 ka mga unit nga mahimong kapuy-an sa mga benepisaryo nga mao ang mga nagpuyo daplin sa kadagatan.

Kini manukad sa Barangay Pajo, paingon sa Pusok, Ibo, Buaya, Barangay Mactan ug Punta Ingano nga gitinguha nilang mapahimutang sa luwas ug pirmanente na nilang pinuy-anan.

Matud pa niya ang luna nga nahimutang sa Barangay Kalawisan nga duha ka ektarya ang mahimong kapuy-an sa 1,500 ka mga informal settlers diin unang pagatukoron ang lima ka andana nga kapuy-an sa 200 ka pamilya.

Si Mayor Chan miingon nga ang kagamhanan sa Siyudad sa Lapu-Lapu adunay gigahin alang sa maong proyekto nga nagkantidad og P230 milyones alang sa Phase 1.

Ang matag unit adunay gilapdon nga 24 metro kuwadrado nga ilang pagabayran sulod sa 25 ka tuig sa kantidad nga P2,900.00.

Gipasabot sa mayor nga ang kagamhanan sa dakbayan sa Lapu-Lapu mohatag og subsidy nga P1,000 sulod sa lima ka tuig nga pagdatadata niini.  MEL BANAT NEWS