Pagkatapos mong sigawan o paluin ang iyong anak

KAPAG paulit-ulit na nakararanas ng takot at matinding tensiyon ang bata, maaaring maging mas madalas ang kanyang pagkabalisa at maging mahirap para sa kanya ang pagkontrol ng emosyon. Maaari ring maapektuhan ang kanyang pagtuon ng pansin, pag-aaral at pakikisalamuha.

Gayunman, hindi pare-pareho ang epekto sa lahat ng bata. Depende sa edad, dalas at tindi ng pananakit, suporta mula sa ibang mapagkakatiwalaang tao, at kung ligtas at mapagmahal ang kapaligiran niya sa kabuuan.

Mahalagang tandaan: Hindi nangangahulugang habambuhay nang traumatized ang bata kapag minsan siyang napagalitan. Malaki ang maitutulong ng paghingi ng tawad, mahinahong pagpapaliwanag at pagbabago ng paraan ng pagdidisiplina. Ngunit ang paulit-ulit na paninigaw at pananakit ay may mas malaking panganib na magdulot ng emosyonal at asal na problema.

Paano itatama ng magulang ang pagkakamali?

• Humingi ng tawad nang taos-puso.

• Itama ang asal, hindi durugin ang pagkatao.

• Makinig bago magparusa. Alamin kung bakit niya ginawa ang isang bagay at tulungan siyang matutong gumawa ng mas mabuting desisyon.

• Kontrolin muna ang sariling galit. Kapag nararamdamang mawawalan na ng kontrol, huminto muna at lumayo sa bata at magmuni-muni.

Ang layunin ng magulang ay hindi lamang magkaroon ng anak na sumusunod, kundi isang anak na lumalaking may tiwala sa sarili, marunong umunawa at nakadarama ng seguridad sa sariling tahanan.