Barangay peacekeeper itinumba

MANILA, Philippines — Pinagbabaril sa harap ng kanyang bahay ang isang miyembro ng Barangay Peacekeeping Action Team ng hindi pa kilalang gunman, kamakalawa ng gabi sa Purok Pag-asa, Sitio Tiocao, Barangay Linao, Matalam, North Cotabato.

Ang biktima na namatay noon din ay kinilalang si Ronie Samson Esquerida, 48, may-asawa at residente ng nasabing lugar.

Sa ulat, pasado alas-10:00 ng gabi ay nakatayo ang biktima sa harap ng kanyang bahay nang sumulpot ang gunmen at walang kaabog-abog na ito ay pinagbabaril na agad nitong ikinasawi.

Isa sa anggulong sinisilip ng pulisya ay personal na alitan dahil sa posibleng may nagalit dito sa pagpapatupad ng kanyang tungkulin.