Rody nakiramay sa napatay na pulis-Antipolo

MANILA, Philippines – Nakiramay kahapon ang Pangulong Rodrigo Duterte sa  pamilya ng napatay na pulis na si Sr. Insp. Mark Gil Garcia, ng dalawang drug pusher sa isang buy bust operation sa Antipolo City noong Biyernes ng gabi.

Dakong alas-4:50 ng hapon nang makarating ang Pangulong Duterte sa burol ni Insp. Garcia sa Multipurpose Hall ng PNP Rizal provincial office sa Taytay, Rizal kung saan ay sinalubong siya ni Judy, misis ng napatay na pulis, mga kaanak at kaibigan.

Nangako ang Pangulo kay Judy ng scholarship program para sa pag-aaral ng tatlong anak ni Insp. Garcia kung saan ang bunso na isang lalaki ay  dalawang buwang gulang pa lamang. 

Nagbigay din ang Pangulo ng 270,000 sa pamilya ni Garcia.

Si Insp. Garcia ay napatay sa ikatlong mission nito kung saan ay anim na pusher ang kanyang nadakip kabilang ang isang kagawad ng militar.

Binaril ng sumpak si Insp. Garcia ng isa sa dalawang drug pusher kung saan tinamaan siya malapit sa pantog, pero bago siya bumagsak ay nagawa pa niyang makabunot ng kanyang baril at napatay ang dalawang pusher na ang isa ay kinilalang si Willaim Malana habang ang isa ay hindi pa nakikilala.