Lady Blazers sinolo ang liderato
MANILA, Philippines — Nagtala na naman ng impresibong panalo ang defending champions College of St. Benilde matapos magtulungan sa opensa sina Michelle Gamit at Wielyn Estoque upang kalusin ang Jose Rizal University, 25-13, 25-12, 25-20 sa NCAA Season 99 women’s volleyball tournament kahapon sa Filoil EcoOil Arena sa San Juan City.
Kumana sina Gamit at Estoque ng tig-walong puntos para sa Lady Blazers na pinahaba ang winning streak sa 32 sa loob ng apat na taon at masolo ang liderato.
Hawak ang 3-0 kartada, halos ipasok ni head coach Jerry Yee ang lahat ng kanyang players, kaya walang nakapuntos sa kanila ng double digits.
“We try not to mind those, we don’t even count,” sabi ni Yee. “Kulang pa sa execution, dami pang kulang, dami pang aayusin. Hopefully, maayos namin,”
Bukod kina team captain Jessa Dorog at libero Fiona Getigan, ang lahat ng players ay umiskor.
Inihahanda na ni Yee ang ibang mga players dahil isang season na lamang maglalaro sina starters Gamit, Jade Gentapa, Cloanne Mondonedo at Gayle Pascual na mga graduating athletes.
Tumipa naman si Mary May Ruiz ng siyam na puntos pero hindi sapat upang itaguyod sa panalo ang Lady Bombers na nalasap ang pangalawang talo sa tatlong salang.
- Latest
