Nuggets dinomina ang Thunder

DENVER — Dahil sa dominasyon ng Nuggets ay maagang ipinahinga si star center Nikola Jokic.

Humakot si Jokic ng 27 points, 12 rebounds at 6 assists bago iupo sa fourth quarter sa 119-101 pagrapido ng Denver sa bisitang Oklahoma City para sa kanilang ikaanim na sunod na panalo sa Thunder sa kanilang balwarte.

Nagdagdag si reserve Monte Morris ng 15 points at nagtala si Paul Millsap ng 13 points at 12 rebounds sa pang-pitong panalo ng Nuggets sa 14 laro.

“He doesn’t get a lot of credit as he should, maybe because he (isn’t) flashy with the dunks,” sabi ni Morris kay Jokic. “He’s got a touch I’ve never really seen. He’s definitely a future Hall of Famer.”

Humugot naman si Luguentz Dort ng 15 sa kanyang 20 points sa first half sa panig ng Thunder (6-7).

Nagsimulang makawala ang Denver sa second quarter patungo sa pagtatala ng 26-point lead sa third period na hindi na napababa ng Oklahoma City.

Sa Salt Lake City, naglista si guard Donovan Mitchell ng 28 points at 7 rebounds para banderahan ang 118-102 tagumpay ng Utah Jazz (10-4) kontra sa  New Orleans Pelicans (5-8).

Ito ang pang-anim na arangkada ng Jazz na nagsalpak ng kabuuang 21 three-point shots para talunin ang New Orleans.

Nag-ambag si Fil-Am guard Jordan Clarkson ng 18 points, 6 rebounds at 6 assists habang may 15 markers si reserve Joe Ingles para sa Utah.

Kumolekta naman si center Rudy Gobert ng 13 points, 18 rebounds at blocks.

Nakahugot ang New Orleans kay Zion Williamson ng 32 points fat may 15 markers si Brandon Ingram.